2026-njy ýylyň «Garaşsyz, baky Bitarap Türkmenistan – bedew batly at-myradyň mekany» ýyly diýlip atlandyrylmagy bilen ahalteke bedewlerimiziň dünýädäki şan-şöhratyny has-da artdyrmak, halkara hyzmatdaşlygy ösdürmek, parahatçylyk we dostluk gatnaşyklaryny ilerletmek hem-de halkara jemgyýetçiligiň halkymyzyň medeni mirasy bilen tanyşdyrylmagy üçin uly mümkinçilikleri döredýär. Ahalteke bedewi türkmen halkynyň milli buýsanjy, dünýä medeni – mirasynyň gymmatly hazynalarynyň biridir. Ýaňy ýakynda Niderlandlar Patyşalygynda ahalteke atlaryň arasynda atly sport we gözellik bäsleşiginiň dünýä çempionatynyň çäklerinde ahalteke bedewleriniň gözelligini çeper beýan edýän «Ahalteke bedewi – gözelligiň naýbaşy nusgasy» atly halkara bäsleşigi geçirildi. Ýewropa yklymynda ilkinji gezek geçirilen bäsleşige gatnaşan sungat işgärleri ahalteke bedewleriniň tebigy gözelligini sungat eserlerinde çeper wasp etmekde nakgaşçylyk, heýkeltaraşlyk, zergärçilik, haly we fotosurat eserleriniň üsti bilen olaryň taryhy ähmiýetini, gözelliginiň taryhy aýratynlyklaryny we halkara derejesindäki şan-şöhratyny giňden açyp görkezdiler. Bu bolsa şanly ýylda behişdi bedewlerimiziň şan-şöhratyny dünýä ýaýmakda ägirt uly goşant boldy. Halkara bäsleşige sungat ojagymyz bolan Türkmenistanyň Döwlet çeperçilik akademiýasynyň halypa suratkeş mugallymlary we ýaş zehinli talyplary hem gatnaşdylar. Behişdi bedewleriň gözelligini nakgaşçylyk eserlerinde wasp etmek boýunça Türkmenistanyň Döwlet çeperçilik akademiýasynyň dizaýn kafedrasynyň mugallymy Arslan Atahanowyň «Garaşsyz» atly nakgaş eseri ýeňiji diýlip yglan edildi. Heýkel eserlerinde wasp etmek boýunça heýkeltaraşlyk kafedrasynyň mugallymlary Patdyk Patdykow «Maşgala» atly heýkel eseri I orna we Ahat Mälikow «At – myrat» atly heýkel eseri bilen II orna mynasyp boldular. Atlaryň gözelligini haly eserlerinde wasp etmek boýunça amaly-haşam sungaty kafedrasynyň mugallymy Bahar Pirgulyýewa «Bedew» atly eseri bilen ganaşyp, II orna mynasyp boldy. Ahalteke atlarynyň gözelligini fotosuratlarda wasp etmek boýunça amaly-haşam sungaty fakultetiniň 6-njy ýyl talyby Nurmuhammet Ýolamanow «Behişdi bedewler» atly foto eserler toplumy bilen gatnaşyp, II orna mynasyp boldy. Bu halkara bäsleşiginde Türkmenistanyň Döwlet çeperçilik akademiýasynyň mugallymlarynyň we talyp ýaşlarynyň baýrakly orunlaryna mynasyp bolmagy bizi diýseň buýsandyrýar we begendirýär. Ahalteke bedewleriniň gözelligini dünýä ýüzünde ýaýmakda giň mümkinçilikleri döredip berýän Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlary sag bolsun, ömürleri uzak tutýan tutumly işleri mundan beýläk hem rowaçlyklara beslensin! Hesel BEKMURADOWA, Türkmenistanyň Döwlet çeperçilik akademiýasynyň Şekillendiriş sungatynyň taryhy we nazaryýeti hünäriniň 2-nji ýyl talyby
Türkmenistanyň Garaşsyzlygynyň şanly 35 ýyllyk baýramy mynasybetli Türkmen döwlet ykdysadyýet we dolandyryş institutynyň hem-de Türkmen döwlet maliýe institutynyň bilelikde taýýarlan «Garaşsyz Türkmenistanyň durmuş-ykdysady ösüşi» atly ylmy makalalar ýygyndysy çap edildi. Ýygyndy bu iki ýokary okuw mekdebiň professor-mugallymlarynyň ýurdumyzyň ykdysadyýetiniň dürli ugurlaryna degişli bolan ylmy makalalaryny öz içine alýar. Olarda Garaşsyzlyk ýyllarynda ýurdumyzyň durmuş-ykdysady ösüşinde gazanylan üstünlikler, amala aşyrylýan giň gerimli özgertmeler hem-de ösüşiň geljekki ileri tutulýan ugurlary ylmy taýdan seljerilýär. Awtorlar nazary garaýyşlaryny milli ykdysadyýetimiziň häzirki ösüş tejribesi we halkara tejribesi bilen utgaşdyrýarlar. Ýygyndynyň neşir edilmeginiň baş maksady ýurdumyzyň Garaşsyzlyk ýyllary içinde geçen ösüş ýoluny ylmy nukdaýnazardan şöhlelendirmekden, gazanylan oňyn netijeleri ýaýbaňlandyrmakdan we ykdysadyýetiň mundan beýläk-de durnukly ösdürilmegine gönükdirilen çemeleşmeleri öňe sürmekden ybaratdyr. Neşir mazmun taýdan köptaraplydyr. Ýygyndydaky ylmy makalalarda milli zähmet bazary, gymmatly kagyzlar bazary, maýa goýum syýasaty, bank hyzmatlary, döwlet býujeti, salgyt ulgamy, ätiýaçlandyryş, maliýe hasabatlylygy, telekeçilik, daşary söwda dolanyşygy, senagat, ulag ulgamy we azyk howpsuzlygy bilen bagly meseleler giňişleýin beýan edilýär. Şeýle hem olarda kärhanalaryň maliýe serişdelerini netijeli dolandyrmak, müşderileriň karza ukyplylygyna baha bermek, döwlet emläklerini hususylaşdyrmak, önümçiligiň özüne düşýän gymmatyny optimallaşdyrmak hem-de ykdysady howpsuzlygy üpjün etmek meselelerine hem aýratyn üns berilýär. Ýygyndynyň möhüm ugurlarynyň biri-de sanlylaşdyrmak bilen baglanyşyklydyr. Sanly ykdysadyýet, emeli aň, sanly ekiz tehnologiýalary, maglumatlary gaýtadan işlemek, elektron täjirçiligi, häzirki zaman programmirleme dilleri we ykdysady ösüşi seljermegiň matematiki usullary barada taýýarlanan ylmy makalalar neşiriň döwrebap mazmunyny baýlaşdyrýar. Innowasiýalaryň we ýokary tehnologiýalaryň ykdysady ösüşi ýokarlandyrmakdaky möhüm orny ylmy makalalarda giňişleýin açylyp görkezilýär, olaryň önümçiligiň netijeliligine hem-de bäsdeşlige ukyplylygyna ýetirýän täsiri ylmy taýdan esaslandyrylýar. Neşirdäki ylmy makalalarda durnukly ösüş, ýaşyl we galyndysyz ykdysadyýet, bioykdysadyýet, ekologiýa taslamalary, gaýtadan dikeldilýän energiýa çeşmeleri, bilimleriň ykdysadyýeti hem-de ýaşlar telekeçiligi baradaky ylmy garaýyşlara hem giň orun berilýär. Bu neşir professor-mugallymlar, ylmy işgärler, aspirantlar, alymlyk derejesine dalaşgärler, magistrantlar, talyplar we ykdysadyýet bilen gyzyklanýan giň okyjylar köpçüligi üçin ykdysady ugurly gymmatly maglumat çeşmesi bolup biler. Türkmen döwlet ykdysadyýet we dolandyryş instituty Türkmen döwlet maliýe instituty
Berkarar döwletiň täze eýýamynyň Galkynyşy döwründe bilim ulgamynda innowasiýalary ornaşdyrmak, şeýle hem bilimiň hiline garaşsyz monitoringi ýokarlandyrmak, Türkmenistanda ýokary hünär bilimini ösdürmegiň 2026-2052-nji ýyllar üçin Strategiýasyny amala aşyrmak boýunça ýerine ýetirilmeli çäreleriň 2026-njy ýyl üçin Meýilnamasynda göz öňünde tutulan işleri durmuşa geçirmek hem-de 2023-nji ýylyň 21-nji iýulynda Türkmenistanyň Bilim ministriniň 291 belgili buýrugy bilen tassyklanan «Türkmenistanda ýaşlary hünäre ugrukdyrmak işlerini geçirmek barada Gözükdirijiniň» talaplaryny berjaý etmek, ösüp gelýän ýaş nesliň lukmançylyk hünärlerine bolan höweslerini artdyrmak, zehinli mekdep okuwçylaryny ýüze çykarmak we goldamak maksady bilen 2026-njy ýylyň sentýabr aýynyň 18-ne Myrat Garryýew adyndaky Türkmenistanyň Döwlet lukmançylyk uniwersitetinde «Garaşsyz, baky Bitarap Türkmenistan – bedew batly at-myradyň mekany» ýylynda Garaşsyzlygymyzyň 35 ýyllyk toýy mynasybetli ýurdumyzyň umumybilim berýän orta mekdepleriniň ýokary synp okuwçylarynyň arasynda geçirilen Biologiýa dersi boýunça bäsleşigiň döwlet tapgyrynyň jemi jemlendi. Bäsleşigiň çäginde uniwersitetimiz bilen tanyşlyk, paýtagtymyzyň gözel ýerlerine syýahat hem-de dabaraly ýagdaýda sowgat gowşurylyşyk ýaly çäreler gurnaldy. Çekeleşikli geçen bäsleşikde has gowy netije görkezen Ahal welaýatynyň Babadaýhan etrabynyň ýöriteleşdirilen 19-njy orta mekdebiniň 11-nji synp okuwçysy Garaýew Sähetmyrat I orna, Ahal welaýatynyň Babadaýhan etrabynyň 18-nji orta mekdebiniň 12-nji synp okuwçysy Maksadowa Güljemal, Mary welaýatynyň Türkmengala etrabynyň 20-nji orta mekdebiniň 12-nji synp okuwçysy Annamämmedowa Aýnur II orna, Lebap welaýatynyň Kerki etrabynyň ýöriteleşdirilen 37-nji orta mekdebiniň 12-nji synp okuwçysy Aşirow Şanazar, Balkan welaýatynyň Balkanabat şäheriniň 20-nji orta mekdebiniň 12-nji synp okuwçysy Esenowa Aýlar, Daşoguz welaýatynyň Daşoguz şäheriniň ýöriteleşdirilen 10-njy orta mekdebiniň 12-nji synp okuwçysy Atajanowa Mähri III orna mynasyp boldylar. Myrat Garryýew adyndaky Türkmenistanyň Döwlet lukmançylyk uniwersiteti
2026-njy ýylyň 18-nji sentýabrynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimize Koreýa Respublikasynyň Songýungwan uniwersitetiniň syýasy ylymlaryň hormatly doktory derejesiniň berilmegi mynasybetli Türkmenistanyň Daşary işler ministrliginiň, Türkmenistanyň Bilim ministrliginiň hem-de Türkmenistanyň Ylymlar akademiýasynyň bilelikde guramagynda dabaraly maslahat geçirildi. Maslahata ýurdumyzyň ähli ýokary okuw mekdepleriniň mugallymlary we talyp ýaşlary gatnaşdylar. Dabaraly maslahatda Türkmenistanyň Ministrler Kabinetiniň Başlygynyň Orunbasary, Türkmenistanyň Daşary işler ministri Raşid Meredow, Türkmenistanyň Daşary işler ministrliginiň Halkara gatnaşyklary institutynyň Parahatçylyk we bitaraplyk kafedrasynyň müdiri, Türkmenistanyň Gahrymany, syýasy ylymlaryň doktory Aksoltan Ataýewa, ÝUNESKO-nyň işleri barada Türkmenistanyň Milli toparynyň jogapkär sekretary, Türkmenistanyň Gahrymany, filosofiýa ylymlarynyň kandidaty Çynar Rustemowa, Türkmenistanyň Ylymlar akademiýasynyň prezidenti, fizika-matematika ylymlarynyň doktory, Türkmenistanyň Ylymlar akademiýasynyň habarçy agzasy Allaberdi Aşirow, Türkmenistanyň Bilim ministri, taryh ylymlarynyň kandidaty Jumamyrat Gurbangeldiýew, Türkmenistanyň Daşary işler ministrliginiň Halkara gatnaşyklary institutynyň rektory, pedagogika ylymlarynyň kandidaty Gülşat Ýusupowa, Halkara ynsanperwer ylymlary we ösüş uniwersitetiniň rektory, pedagogika ylymlarynyň kandidaty Maral Kuliýewa, Döwletmämmet Azady adyndaky Türkmen milli dünýä dilleri institutynyň rektory, pedagogika ylymlarynyň kandidaty Maksat Çaryýew, Türkmenistanyň Oguz han adyndaky Inžener-tehnologiýalar uniwersitetiniň prorektory Azat Babaýew hem-de koreý dilinde Döwletmämmet Azady adyndaky Türkmen milli dünýä dilleri institutynyň Gündogar dilleri we edebiýaty fakultetiniň 3-nji ýyl talyby Leýli Döwletowa çykyş etdiler. Çykyş edenler hormatly Prezidentimiziň Koreýa Respublikasyna döwlet saparynyň çäklerinde köptaraplaýyn hyzmatdaşlygyň ýyl ýazgysynda taryhy sahypany açýan “Merkezi Aziýa — Koreýa Respublikasy” ilkinji sammitine gatnaşmagy we häzirki zaman halkara gatnaşyklarynyň ählumumy özgerýän şertlerinde bu sammitiň geçirilmegi Merkezi Aziýa sebitiniň dünýäniň geosyýasy we geoykdysady ulgamynda barha artýan ornuny görkezýändigi barada giňişleýin bellediler. Şeýle hem, hormatly Prezidentimiziň sammitiň dowamynda eden çykyşynda senagat, oba hojalygy, ekologiýa, suw meselesi, saglygy goraýyş, hyzmatlar ulgamy, syýahatçylyk häzirki wagtda möhüm ugurlaryň hatarynda durýandygyny belläp, bu babatda “Ösüşiň we innowasiýalaryň bähbidine Merkezi Aziýanyň we Koreýa Respublikasynyň geljekki hyzmatdaşlygy” şygary bilen geçiriljek “Merkezi Aziýa — Koreýa Respublikasy” işewürlik sammitiň möhüm waka boljakdygy barada nygtandygyny dabaranyň dowamynda çykyş edenler buýsanç bilen aýtdylar. Arkadagly Gahryman Serdarymyz öz çykyşynda: “Bilim ulgamynda biz Merkezi Aziýa ýurtlarynyň hem-de Koreýa Respublikasynyň bilim edaralarynyň arasynda hyzmatdaşlygyň täze görnüşlerini, şol sanda iki diplomlylyk maksatnamalaryny ösdürmegi teklip etdik. Şeýle-de ýaşlaryň sanly bilimlerini artdyrmagy, bilelikdäki olimpiadalary, bäsleşikleri we maslahatlary geçirmegi wajyp hasap edýäris. Ylym ulgamynda ýaş alymlaryň bilelikdäki ylmy-barlag, taslama-gözleg işlerini işjeňleşdirmegi, Ýaşlaryň innowasion pikirlerini ösdürmegi we ornaşdyrmagy goldamak institutyny döretmegi teklip edýäris” diýip bellemegi bilim ulgamyny has-da kämilleşdirmäge itergi berjekdigi barada hem aýratyn nygtaldy. Bellenilişi ýaly, Medeniýet ulgamynda Türkmenistan tarapyndan Merkezi Aziýa ýurtlarynyň we Koreýa Respublikasynyň ýaşlarynyň medeniýetara alyşmalarynyň “Ýol kartasy”, şeýle-de “Ýaş zehinler” maksatnamasy teklip edildi. Hormatly Prezidentimiz döwletlerimiziň ýaşlaryny birleşdirýän festiwallary, konsertleri, döredijilik bäsleşiklerini we beýleki çäreleri geçirmegi dowam etdirmegiň zerurdygyny aýdyp, sport hyzmatdaşlygyny, şol sanda hünärmenler alyşmalaryny ösdürmegi, sagdyn durmuş ýörelgelerini ilerletmegi, Merkezi Aziýa ýurtlarynyň hem-de Koreýa Respublikasynyň Halkara ýaşlar sport oýunlaryny guramak baradaky meselä seretmegi teklip edendigi dogrusynda maslahatyň dowamynda aýdylyp geçildi. Hormatly Prezidentimiziň Koreýa Respublikasyna amala aşyran döwlet saparynyň çäklerinde 600 ýyldan gowrak taryhy bolan meşhur Songýungwan uniwersitetiniň prezidenti Ýu Ji Bom tarapyndan hormatly Prezidentimize baý syýasy tejribesini, ykdysadyýeti diwersifikasiýalaşdyrmak arkaly durnukly döwlet ösüşini ýola goýandygyny hem-de Merkezi Aziýada durnuklylygy we hyzmatdaşlygy pugtalandyrmaga goşan goşantlaryny göz öňünde tutup, Aspirantura komitetiniň karary bilen syýasy ylymlaryň hormatly doktory derejesiniň berlendigi barada dabaraly maslahata gatnaşyjylar buýsanç bilen bellediler. Ýeri gelende bellesek, 1957-nji ýyldan bäri bu ýokary dereje bary-ýogy 101 adama, şol sanda 2015-nji ýylda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza berilipdi. Türkmenistanyň Daşary işler ministrliginiň Halkara gatnaşyklary institutynda hormatly Prezidentimize Koreýa Respublikasynyň Songýungwan uniwersitetiniň syýasy ylymlaryň hormatly doktory derejesiniň berilmegi mynasybetli geçirilen dabaraly maslahatyň ahyrynda oňa gatnaşyjylaryň adyndan Türkmenistanyň Prezidenti Serdar Berdimuhamedowyň adyna Ýüzlenme kabul etdiler. Merjen GURBANNAZAROWA, Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy
Daşary ýurtda bilim almak üçin güwänamanyň tertibi we resminamalaryň sanawy.
Geçmek →Kanunlar, kararlar, buýruklar we usuly görkezmeler — bir bitewi sanawda.
Geçmek →Döwlet ders bäsleşikleri, halkara olimpiadalar we döredijilik bäsleşikleri.
Geçmek →Ministrligiň bölümleri, gyzgyn aragatnaşyk telefonlary we kabul ediş tertibi.
Geçmek →
Tazelikler
2026-njy ýylyň «Garaşsyz, baky Bitarap Türkmenistan – bedew batly at-myradyň mekany» ýyly diýlip atlandyrylmagy bilen ahalteke bedewlerimiziň dünýädäki şan-şöhratyny has-da …
Tazelikler
Türkmenistanyň Garaşsyzlygynyň şanly 35 ýyllyk baýramy mynasybetli Türkmen döwlet ykdysadyýet we dolandyryş institutynyň hem-de Türkmen döwlet maliýe institutynyň bilelikde taýýarlan …
Tazelikler
Ýakynda Russiýa Federasiýasynyň paýtagty Moskwa şäherinde geçirilen «Häzirki zaman bilimi. Wajyp meseleler we çözgütler» atly halkara ylmy-amaly maslahata türkmenistanly alymlar …
Tazelikler
Berkarar döwletiň täze eýýamynyň Galkynyşy döwründe bilim ulgamynda innowasiýalary ornaşdyrmak, şeýle hem bilimiň hiline garaşsyz monitoringi ýokarlandyrmak, Türkmenistanda ýokary hünär …
Tazelikler
2026-njy ýylyň 18-nji sentýabrynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimize Koreýa Respublikasynyň Songýungwan uniwersitetiniň syýasy ylymlaryň hormatly …
Tazelikler
Tokio şäherinde 16-njy sentýabrda Birleşen Milletler Guramasynyň Neşe serişdeleri we jenaýatçylyk baradaky müdirliginiň (UNODC) sebit maslahaty öz işine başlady. Ýaşlaryň …
Bilim ministrligi
Dil saýlaň
